Melambe [Bahasa:memohon berkat] – [English:make a wish]

Dalam kepercayaan masyarakat Toraja, seseorang akan dianggap layak untuk memohon berkat jika terlebih dahulu melakukan upacara pembersihan atau pengakuan dosa.

Masuru’mo kanan kairinna te to merrapu tallang, masara’ka’mo tingayo boko’na te to ma’kaponan ao’.

Urria tannun kandena Puang, ussembe’ talikuran timbu’ to Tumampa

La ungkadangmora’ tua’ sanda, la ullua’ mora paraya pantan.

Tang tua’na sangtondokta, tang parayanna sangbanuanta.

Parayanna ia to ma’bala lembang, tua’na ia to ma’rampo minanga.

Moi manda’ ko naluang bulan, bintin nasembe’ barrena allo.

Manarang ia Puang Matua ulu umbukai ulangi lammai lindona bulan,
mabangko ia to Kaubanan ingko’ka’kaludende’i lammai barrena allo

Anna timba’ tua’na dio bontik lan di Duri, Usse’pa parayanna tallu topongna lan ri Rumenden

Untimba tua’na Datu Lan di Palopo, usse’pa’ parayanna to diamben pallongi-longi lan di tana tangnga.

Untimba’ tua’na pong bala bassi daa ulunna salu, usse’pa’ parayanna pong Seppa bulaan diong rampe matampu’

Anna polalan tete tang ka’tu. unnola lombok tang kea’-kea’

Napalimbongi diong ballaran ampa’, napatasikki diong rampean tuyu.

Anna popeninanni lan inan maelona, anna patonganni lan pata’ kapayunganna.

Ia tu tua’ na mellolo tau, parayanna takinan pia la limbongko dao bangunan banua.

Ia tu tua’na rendenan tedong, la limbongko lan bala makullin.

Ia tu tua’na banne malapu’, la limbongko dao sembangan uru-nangka’.

Ia tu eanan sanda makamban barang apa sanda umba’na, la limbongko diong pala’na to merrapu tallang, la tasikko diong talu’tuk tarunona to memponan ao’

Lanapatoding kalua’ko lan tangngana tondok, la naposamara kalandoko lan ma’lipu ditarik.

Anna kendek sakendek-kendekna pantaranakna inde kapenomban.

Anna kerrangan kapaissanan dio to merrapu tallang, anna buda kakinaan dio to memponan ao’.

Nasakendek-kendekna mendaun sugi’, na salangngan-langnganna menta’bi eanan.